5 DECEMBER, MARHOOM SHEIKH MOHAMMAD ABDULLAH KE NAAM

KHUDA KA SHUKR APNE PAAS BHI QALB-E-PARESHAN HAI
MAGAR USS MAIN PARAAYI DHADKANAIN HAR PAL DHADAKTI HAIN
KHUDA KA SHUKR HUM KASHMIRIYON KE PAAS AANKHAIN HAIN
HILAAL-E-EID PHIR HUM KO DIKHAYI KYUN NAHIN DETA
HUMARI EID AAYEGI YEH KYUN MUMKIN NAHIN HOTA
KOI AILAAN SARHAD PAAR SE JAB TAK NAHIN HOGA
KHUDA KA SHUKR APNA BHI DIMAAG AZHAD-KUSHADA HAI
MAGAR USS MAIN HUMEIN NE KUCH KIRAIYEDAAR RAKHE HAIN
KHUDA KA SHUKR APNE PAAS BHI TAAREEKH HAI APNI
MAGAR TAAREEKH DAANOON NE ISAY TAAREEK KAR DALA
HUMARI BAD-NASEEBI KA KHULASA HAI TO ITNA HAI
KI APNA JASHN-E-AAZADI KABHI HUMNE NAHIN DEKHA
KABHI USS PAAR WAALOON KE KABHI ISS PAAR WAALOON KE
MANAYE JASHN-E-AAZADI KHALOOS-O-SHOQ SE HUMNE
KABHI ISS PAAR KE JHANDE KABHI USS PAAR KE PARCHAM
HAWA MAIN KHOOB LEHRAYE BOHAT HI JOSH SE HUMNE
SUJHAYI KUCH NAHIN DETA KISE APNA WATAN SAMJHEIN
KI HUM JAKDE HUE HAIN AQL-O-DIL KE IK SHIKANJE MAIN
HUMARI BAD-NASEEBI KI KAHANI HAI TO ITNI HAI
KI HUM APNA WATAN AB TAK MUTAYYIN KAR NAHIN PAAYE
MUTAYYIN KAR TO SAKTE THE MAGAR YEH BAD-NASEEBI THI
KI APNE PAAS BHI SAB SE QADAAWAR REHNUMA TO THHA
HUMAIN LAIKIN WATAN KA WOH TASAVUR DE NAHIN PAAYA.